الحزن... كنت دايما بعرف الكلمه ده على أنها طاقه سلبيه موجوده جوانا وكنت دايما بقول انه بيكسر حاجات حلوه اوي وبمجرد انها اتكسرت خلاص عمرك ماهتعرف ترجعها تاني .
كان دايما بيعلق في ذهني صورة الروح بطفله صغيره منطلقه احلامها كتير وضحكتها من قلبها والحزن ده وحش كاسر بيفترس كل حاجه حلوه قدامه وكل ماحزنك يزيد الوحش ده يزيد من قوته وجبروته..وتخاف البنت الصغيره وتنكمش اكتر واكتر لحد ماييجي يوم تموت من كتر خوفها ووقتها عمرها ماهترجع تاني !
طيب ايه لازمته الكلام الكئيب ده ..! لانه بمنتهى البساطه اكتشفت انه كله غلط !
امبارح كنت بقلب في البلوج من اول بوست نزلته وكنت عماله بتفرج على اللي كنت كاتباه انا قعدت اضحك وفيه حاجات ماكنتش برضى اكملها للاخر من كتر ما انا بضحك عليها .. على الرغم من انه كلام حزين وانا كنت في يوم من الايام كنت كاتباه وانا حاسه انه ده نهاية الدنيا بالنسبه ليا وانه خلاص كل حاجه حلوه ممكن تكون جوايا ماتت بسبب الحزن اللي عيشت نفسي فيه .. بس مرت الايام وبقيت بفتكر نفسي وانا زعلانه واضحك عليا اوي
وساعتها افتكرت كلمه كانت ماما قالتهالي مره .. قالتلي كل حاجه في الدنيا ده بتتولد صغيره وبتكبر مع الايام الا حاجه واحده بس بتتولد كبيره اوي وبتصغر مع الايام لحد ما ييجي يوم وننساها وتبقى ذكرى زي بقية الذكريات هو الحزن .
بجد الحمدلله على نعمة النسيان يمكن بناخد وقت شويه وبنتعب شويه بس هاييجي يوم وننسى بس دايما بقول اهم حاجه اننا نستمد الطاقه الايجابيه من اللي حوالينا من احلامنا من اصحابنا من كل حاجه حلوه حوالينا
واي حزن ممكن يبقى حد فينا فيه هيعدي وهننساه وهاتيجي احزان جديده وهتعدي برضه ان شاء الله وهننساها بس اهم حاجه تفضل الروح الجميله حوانا اللي متمسكه بالحياه ومتمسكه لغد افضل ومستقبل احسن :)
كلمتين كالعاده جوايا :D
,,,,,,,,,,,,,,,,,,,,,,,,,,,,
وكل سنه وانتم طيبين ويارب يكون رمضان فتحة خير علينا جميعا:)
ربنا يحفظك من اى هم او حزن ياشيماء
انا مع خالتو جدا في كلمتها بس تصدقيني لو قلت لك انه مش الحزن بيبدأ كبير وبيصغر
لكن الاغلب الاعم فعلا بتحسيه في اوله كبير اوي لدرجة بتتخيلي فيها حياتك توقفت عن الشئ اللى تسبب في حزنك وبتتصوري انه لا يمكن يعدي أبدا لكن سبحان الله لحكمته ولطفه بينا بننسى وما سمى الانسان الا من النسيان
لكني مقتنعة نه مش كل الحزن بيبدأ كبير وبيصغر
فيه حزن بيبدأ كبير .. وبيفضل جوانا كبير مهما مرت السنين عليه :(
يعني رغم مرور سنين على وفاة ابي الله يرحمه الا انه حزني على وفاته وفراقه في قلبي ونفسي بنفس درجة حزني يوم ما عرفت الخبر
سبحان الله ..
ياللا المهم كل سنة وانتي طيبة ياجميلة وان شاء الله نتقابل قريبا :)
ونولع الدنيا :D