احذر لعنتي !

هذا المخلوق المُسمَّى بالبرص واقفلي على شباك المطبخ
المشكله زي مانتم شايفين البيه واقفلي من بره والمكان اللي واقف فيه مش بيتفتح فمش عارفه اتصرف معاه على الاطلاق
غير بقى انه غتيت مش مثلا ييجي يوم واحد ويمشي لا ابدا بقى بييجي كل يوم زي ماتقولوا كده دي بقت حتته اللي بيرتاح فيها :((

خطتي كانت في الهجوم على البرص للتخلص منه اعرف عدوك كويس عشان تعرف تهاجمه صح :D
فبدات اقرا بقى عن الابراص عرفت انه كائن ليلي عشان كده مش بيظهر عندي غير بالليل بس بيختفي في الشتاء وبيظهر في الصيف 

وبعدين بدات ادوّر ازاي ممكن اتخلص منه وطبعا نظرا انه من برّه انا محتاجه طريقه جهنميه تخلصني منه 

جبت الاول مبيد حشرات قلت يمكن يتخنق ويموت انا اللي كنت هموت فيها :(
وبعدين قريت موضوع لبان الدكر ده في انه ريحته بتخلي البرص يمشي
وفعلا جربت الموضوع ده وسخنت لبان الدكر على النار وخنقت الشارع كله عشان البيه يمشي طول ماريحة لبان الدكر موجوده فعلا بيمشي بس اول مابتختفي لاقيته بيرجع تاني وطبعا مش هينفع اني افضل مشغله ريحة لبان الدكر دي طول النهار :((

وبصراحه بدأت ايأس مش عارفه اعمل ايه وبعدين في مره قررت اني عايزه اصور المحروس باعتبار انه بقى جزء من العيله بقى خلاص....
 وكانت المفاجئه بقى
كنت بقرب من الشباك بالموبايل وفجأه لاقيته اختفى استغربت قلت يمكن حس بيا ولا حاجه :D
شويه ورجع تاني فجايه بصور من مسافه كده وبعدين بقرب بالموبايل لاقيته برضه اختفى تاني
وهييييييييييييه اكشتفتله نقطة ضعف بقى طلعت ذبذبات الموبايل بترعبه :D
فدلوقتي اول مايقرب اروح احط الموبايل على الشباك الاقيه مشي 

ودي بقى خطتي طويلة الامد انه كل ماييجي هحطله الموبايل ياكشي تجيله عاهه مستديمه ويسيب شباك مطبخي في حاله :D
ودي رساله موجهه لكل حشرات العالم احذروا لعنتي ومطبخي ده خط احمر
نياهاهاهاهاها :D:D