البوست ده عايز يكتب بقاله اسبوع كل يوم ادخل واعمل new post واخرج تاني وماكتبش حاجه يمكن عشان كان الموود مش قد كده ولسه والله مش عارفه فيه ايه الواحد مقفل خالص بس لازم اتكلم يعني:)
انه في يوم الخميس الماضي في تمام الساعه الواحده والنصف ظهرا استيقظت مذعوره على صوت التليفون لاحد صديقاتي
شيماء: النتيجه اتعلقت انتي لسه نايمه؟؟
وطبعا في اقل من الثانيه انتفضت من الفراش وناديت على مروه النتيجه اتعلقت ..وفي ثواني كنت متصله بكل اصحابي ونزلت طنطا اول حاجه عملتها شفت نتيجة مروه الحمد لله عديت اولى وخلصت ربنا يكرمها ان شاء الله.
ورحت بعد كده لاقيت نتيجتي الحمد لله نجحت بس لحظه ...ده مش اي نجاح ولا اي نتيجه ده اخر نتيجه ليا في الكليه ده!! يااااااااااااه 10 تيرمات عدوا عليا في الكليه ده بنفس الشعور بالخوف والقلق من النتيجه والترقب ياترى ربنا ها يسترنا زي كل مره ولا !!؟؟؟
وبعد كده قعدت مع اصحابي شويه في الكليه لان كان بقالنا مده طويله ما شفناش بعض وبعد كده رجعت البيت وبدأ بقى الشريط يرجع معايا :D...انا فعلا كنت بشوف التخرج من كلية العذاب صيدله ده حلم بعييييد كنت شايفاه حاجه بعيده الامد ماكنتش بفكر فيها كتير عشان ماتعبش:D
ياه عليكي يا صيدله هلكتينا فيكي 10 تيرمات مافيش تيرم اقول عليه اهه التيرم ده كان سهل كله رائع ما شاء الله :D
يمكن كانت ايام صعبه وتعبنا فيها اوي بس فعلا بنت شخصية الواحد اتعلم فيها الكتير بجد المرحله الجامعيه ده بتعني لي الكثيير جدا اتعلمت حاجات كتيير طلع منها باصدقاء رائعين اتمنى انهم يكونوا اصدقاء العمر وعرفت فيها معاني كتييير اوي. وغيرتني تماما لان مش هي ده شيماء اللي كانت في ثاناويه عامه من خمس سنين.
مهما اتكلمت بجد مش هقدر اقول حاجه حاسه اني محتاجه صفحات اعد اكتب فيها مش كام سطر .
يمكن فرحتي بالتيجه التيرم ده ماكانتش زي كل تيرم ويمكن مافرحتش بيها اصلا مش عارفه ليه يمكن عشان عارفه ايه اللي مستنيني بعد النتيجه او يمكن عشان انا بقيت كئيبه حبتين الايام ده :)
المهم في الاخر اهم حاجه اني خلصت كلية صيدله واتخرجت وهبدا بقى اشوف طريقي في الحياه .ويارب اكون شيئ كويس حاجه ممكن تفيد الناس ويبقى وجودي في الحياه ذو قيمه مش مجر نفس بشريه موجوده وخلاص .
ومبروووك يامروه عقبال ما اشوفك خريجه انتي كمان وماتخافيش هبقى اشغلك في الصيدليه عندي وهوريكي الويل :P
ومبروووك لكل اصحابي :)
وفي الاخر اقول لا تنسونا من صالح دعائكم :)
احم..طبعا المفروض كنت انا اللي كتبت البتاع دة بس زي ما انتي عارفة مكنش ليه نفس:(
بس بما انك كتبتيه احب اقولك روحي منك لله آه منك لله..
اتخرجتي خلاص وسايباني لوحدي :(:(:(
حاسة ان كان ليه ظهر فالكلية صحيح مكنتيش بتعمليلي اي حاجة بس برضه احساسي اني بقيت لوحدي :(
يلا الحمدلله لعل تخرجك دة يكون وش الخير عليه واعملها مرة في حياتي قبل ما اموت وانجح صافي :D
نقول بقي مبروووووووووووك دكتورة شيماء وربنا يوفقك ويكرمك وييسر لك طريقك ويرزقك الخير ونخلص منك بقي:P
آه ان شاء الله لما تفتحي صيدليتك لابد ان تكون علي مستوي علشان اتواضع وارضي اتدرب فيها:P